مين أشطر شيف أو أشطر مدام أو بنوته تقولنا مقادير عجينة البيتزا ؟ ؟
0 0
بابا غنوج دي أسهل حاجة تعرفوا تعملوها
هاتوا بتنجانة وحطوها في الفرن
وسيبوها شوية تتشوي لحد ماتحسوا انها بقت طرية والقشرة فصلت شوية عن البتنجانة
بعد كده طلعوها وقشروها
وهاتوا خمس فصوص توم كبار (لو عايز تزود براحتك)
وقشروهم ودقوهم كويس وبعد كده قطعوا البتنجانة ودقوها معاها أو اخلطوها كويس أوي معاهم
بعد كده حطوا الملح والفلفل والتوابل اللي تحبوها
وبالهنا والشفا
البتنجان المقلي
بتقشر البتنجان وتقطعه حلقات وتقليه ده لو كان بتنجانن رومي
أما لو بتنجان اللي هو طويل ده
بتشق البتنجانة من النص وتحطها في الزيت بعد ما يسخن
ولما تطلعها بتعمل خلطة كده عبارة عن إيه؟
فلفلة رومي خضرا (اتأكد انها مش مشطشطة)
وخمس فصوص توم وملح وفلفل
تدق التوم كويس وتضيف الملح والفلفل وتقطع الفلفل الرومي صغير خالص
وتقلبهم مع بعض وبعدين تضيف بالمعلقة شوية صغيرة على كل بتنجاناية
طبق الفول
هات ملعقة زيت أو سمنة
سخنها في الطاسة (لو حابب تضيف بصل أو فلفل أخضر ضيفهم عليه وقلبهم تقليبة واحدة)
مش عايز البصل أو الفلفل الأخضر مش مشكلة ممكن تحط على الزيت أو السمنة
كمية الفول اللي على أدك وتقلب كويس
وتضيف الملح والفلفل الأسود وبعد كده تضيف ملعقة طحينة ولمونة
وبالهنا والشفا
تتبيل الفرخة بانيه
تتبيلة الفرخة تختلف عن السمك
المقادير
هتجيب فرخة مخلية
5 بصلات مبشورين
ملح وفلفل اسود
بقسماط وبيضتين
ليمونتين أو معلقتين خل (المتوفر عندك منهم هاته)
الطريقة
هتقلب البصل والملح والفلفل والليمون سوا
وتتبل بيهم الفرخة تقلبها فيهم بإديك كده بحيث تتأكد انها كلها متغطية بيهم
أو اتدهنت بيهم يعني
وبعد كده تسيبها على الأقل ساعتين (لو حابب تسيبها أكتر يستحسن
وخد بالك لو قللت الملح مش مشكلة تقدر تزوده بعد ما تقليها
لكن ماتزودوش عشان مش هتعرف تقلله بعد كده
المهم بعد ماتسيبها في الخلطة بتاعتها الوقت المطلوب
هتخن طاسة زيت
وهتجيب قطعة قطعة من التتبيلة وتضرب البيضتين
وتحطها كده في البيض وتطلعها تحطها في البقسماط
(لو مش فيجيتار وكان بقسماط سادة زود انت عليه شوية ملح وفلفل)
بعد كده حط الفرخة في الزيت على نار متوسطة
وسيبها لحد ما لونها يبقى
دهبي وقرب للبني حاجة بسيطة
(ماتحرقهاش طلعها دوقها حسيت انها مش مستوية حطها تاني)
السمك بقى
طبعا هتكون جايبه نضيف وبطنه متنضفة ومفتوحة وكده
المهم الخلطة بتاعته بتكون شبه خلطة الفراخ لكن بالتوم مش البصل
وبتكون من غير ليمون ولا حاجة
يعني تدق توم مع ملح وفلفل اسود وبس
وتدهن بيها السمك وتحشيه وتسيبه ساعة وبعد كده تقليه بس بالدقيق
يعني بتحط السمكة في الدقيق كده وتنفضها منه بإديك
يعني مش تغرقها دقيق انت بس زي ماتكون بتدهنها بيه من جوة وبرة
وبعدين تحطها في الزيت على نار متوسطة قريبة للهادية
وتستنى لما لونها يبقى دهبي وتشيلها
عن المساهم
- الأسئلة :124
- الإجابات:2267
- مشترك منذ:2012-01-18
- المستوى:مساهم
- النقاط الشهرية :0
- مجموع النقاط:1956